Carlo Ancelotti ayaa ka qaaday xiddiga reer Brazil ee ku caan baxay rigoorada kaddib qaladkii uu ka galay Valencia, iyadoo Kylian Mbappe uu ka faa’iideystay arrintaas.

MAXAA DHACAY? Garabka reer Brazil ee Vinicius Jr ayaa ku guuldareystay inuu kooxdiisa hogaanka u dhiibo goor hore, kadib markii rigoore uu qaaday si sahlan uu u qabtay goolhayaha Valencia ee Giorgi Mamardashvili. Rigooradaas la seegay ayaa noqotay mid qaalis ku noqotay Real Madrid oo ugu dambeyn 2-1 looga adkaaday kulankii horyaalka La Liga toddobaadkii hore. Sida uu qoray wargeyska Marca, tababaraha Carlo Ancelotti ayaa hadda go’aansaday inuu ka qaado Vinicius masuuliyadda rigoorada, iyadoo Kylian Mbappe uu haatan noqon doono qofka koowaad ee u ridaya rigoorada kooxda, iyadoo lagu bilaabi doono kulanka Champions League ee soo socda ee ay la ciyaarayaan Arsenal. SAWIRKA WEYN Khaladkii ka dhacay Valencia wuxuu ahaa rigooradii labaad ee uu Vinicius seego xilli ciyaareedkan 2024-25, isagoo horay uga seegay rigoore kulankii Champions League ee ay la ciyaareen Atletico Madrid. Warbixintu waxay sidoo kale sheegeysaa in haddii Mbappe uu isagana ku guuldareysto inuu rido rigoorada, ciyaaryahanka xiga ee qaadan doona waa Jude Bellingham. Sida Vinicius Jr, Mbappe isna labo rigoore ayuu seegay xilli ciyaareedkan, halka Bellingham uu mar keliya ku guuldareystay. MA OGAYD? Goolhayaha Valencia ee Mamardashvili ayaa shaaca ka qaaday in uu Vinicius Jr la galay sharad xiiso leh. Xilli Vinicius uu diyaarinayay inuu rigoore qaado, Mamardashvili ayaa u sheegay inuu siinayo €50 haddii uu gool dhaliyo, Viniciusna wuu aqbalay oo ku heshiiyay in isaguna bixiyo €50 haddii uu rigoorada seego. MAXAA KA XIGA REAL MADRID? Kooxda Los Blancos ayaa u safraysa Waqooyiga London si ay uga hortagaan Arsenal lugta hore ee wareegga siddeed dhammaadka Champions League oo ka dhici doona garoonka Emirates Salaasada soo socota.