Kevin De Bruyne ayaa go'aansaday inuu uga tago raad Champions League ah kooxda Manchester City.

Kevin De Bruyne oo go’aansaday inuu uga tago Manchester City raad Champions League ah Kevin De Bruyne ayaa si dhab ah ugu heelan inuu kooxda Manchester City u xaqiijiyo booska Champions League kahor inta uusan ka tegin dhamaadka xilli ciyaareedkan. Xiddiga khadka dhexe ee xulka Belgium ayaa horseeday soo laabasho cajiib ah oo ay sameeyeen City, kaddib markii ay 2-0 ka hooseeyeen Crystal Palace, ugu dambeyntiina waxay ku badinayeen 5-2 ciyaartii Sabtidii ka dhacday Etihad Stadium. De Bruyne oo 33 jir ah, kana mid ah ciyaartoyda ugu muddo dheer kooxda, ayaa dhaliyay goolkii ugu horreeyay ee City isagoo laad xor ah si qurux badan u dhameystiray, taasoo ahayd ciyaartiisii ugu horreysay ee garoonka Etihad tan iyo markii la shaaciyay inuu ka tagayo kooxda marka xilli ciyaareedku dhammaado. Guusha City ayaa dib u gelisay kaalinta afaraad, iyadoo ay si adag isugu hayaan kooxaha kaalmaha sare ee horyaalka Premier League. De Bruyne ayaa u sheegay BBC: “Waxaan u maleynayay in ay muhiim ahayd in si degdeg ah loo dhaliyo si dareenka ciyaarta wax looga beddelo. Ma ahayn inaan si xun u ciyaareynay, balse natiijadu ma wanaagsaneen. Laakiin waxaan halkaa ka bilaawnay.” “Waxaan doonayaa inaan kooxda uga tago boos Champions League ah, sababtoo ah way u qalmaan.” “Sagaal ama toban sano ayaan joogay kooxda, waana ka qeyb galnay Champions League mar walba, markaa waxaan rajeynayaa inaan taas u suurtageliyo kooxda xilli ciyaareedka dambe. Aniguna waxaan isku dayayaa inaan ciyaaro kubadda cagta wanaagsan sida aan horayba u sameyn jiray.” Crystal Palace ayaa ciyaarta si xooggan ku bilowday iyadoo labo gool kala timid Eberechi Eze iyo Chris Richards 21 daqiiqo gudahood, balse laad xor ah oo uu dhaliyay De Bruyne ayaa ciyaarta ka beddelay jihada. Intaa ka dib, De Bruyne ayaa ka qeyb qaatay goolasha Omar Marmoush iyo Mateo Kovacic, ka hor inta aysan James McAtee iyo Nico O’Reilly dhammeystirin bandhigga goolasha. Tababaraha City, Pep Guardiola, ayaa yiri: “Qaab ciyaareedka Kevin – sida uu u sameeyay sanado badan iyo kulan badan – wuxuu ciyaaray si heer sare ah. Wuxuu naga caawiyay inaan jebino dareenkii ciyaarta ee aan fiicneyn.” “Mahadnaqa aan u hayo Kevin waa mid aad u weyn. Wuxuu sameeyay waxyaabo cajiib ah, waxaana ogahay inuu mar walba keeni karo waxqabad.” “Maanta xitaa waa la jabiyay, balse marka kubadda uu haysto, aad ayuu u xariif yahay. Goolasha iyo caawinta uu sameeyayna aad bay naga caawiyeen guushan.” “Waxay ahayd 2-0 marka hore, mana sahlaneyn, balse waxaan ku dhegnayn qorshaha. Hadda waxaa noo haray 6 kulan, dhibco ayaan u baahanahay si aan u helno booska Champions League, markaa guushan waxay ahayd mid muhiim ah.” Tababaraha Palace, Oliver Glasner, ayaa muujiyay niyad-jab kaddib markii kooxdiisa ay ka faa’iideysan weyday fursadaha ay heleen markii ay ciyaarta hogaaminayeen. Wuxuu yiri: “Waa niyad-jab, gaar ahaan marka aad laba gool ku horreyso. Si fiican ayaan ku bilownay, gool saddexaad baa naga laalay, fursad weyn ayaana Ismaila Sarr helay.” “Laakiin difaaceenu si fiican uma shaqeyn, khaladaad badan ayaana samaynay. Marka aad kooxda sida City u siiso fursado badan, way gool dhalinayaan. Waa inaan wax ka barannaa, waanan filayaa inaan baran doono.” Labada koox ayaa mar kale is arki kara final-ka FA Cup. Glasner wuxuu sidoo kale yiri isagoo la kaftamaya Pep Guardiola: “Waxaan u sheegay Pep kaddib ciyaarta in haddii aan mar kale kulanno, uusan ciyaari karin nidaamkan, sababtoo ah waan xallin doonaa!”