Kylian Mbappé oo ka goolal badan Cristiano Ronaldo xilli ciyaareedkiisii ugu horreeyay ee Real Madrid

Kylian Mbappé ayaa dhaafay rikoodhkii goolasha ee Cristiano Ronaldo xilli ciyaareedkiisii ugu horreeyay ee Real Madrid, kadib markii uu shabaqa soo taabtay kulankii final-ka Copa del Rey ee ay 3-2 kaga adkaadeen Barcelona.

Mbappé ayaa xilli ciyaareedkan u dhaliyay Real Madrid 34 gool dhammaan tartamada, isagoo sidoo kale goolal ka dhaliyay afar final: guushii 2-0 ahayd ee UEFA Super Cup ee ay ka gaareen Atalanta, guushii 3-0 ahayd ee FIFA Intercontinental Cup ee ay kaga badiyeen Pachuca, guuldarradii 5-2 ahayd ee Supercopa ee Barcelona iyo khasaaradii Copa del Rey.

Cristiano Ronaldo — oo markii dambe noqday gooldhaliyaha taariikhiga ah ee Real Madrid — ayaa xilli ciyaareedkiisii ugu horreeyay ee 2009-10 ka dhaliyay 33 gool dhammaan tartamada.

Ruud van Nistelrooy ayaa isaguna 33 gool ka dhaliyay xilli ciyaareedkiisii koowaad ee 2006-07, halka rikoodhka ugu sarreeya uu haysto ciyaaryahankii reer Chile ee Iván Zamorano oo dhaliyay 37 gool xilli ciyaareedkii 1992-93.

Mbappé ayaa kulankii Sabtidii kasoo galay beddel qeybta labaad, kadib markii uu markii hore kursiga keydka ku bilowday sababo la xiriira dhaawac dhanka anqawga ah.

Xiddiga Faransiiska ah ee 26-jirka ah ayaa muddo dheer bartilmaameed u ahaa Madrid ka hor inta uusan ugu dambeyn xagaagii hore si xor ah uga soo wareegin Paris Saint-Germain.

Mbappé ayaa bishii la soo dhaafay sheegay inuu weli la xiriiro Cristiano Ronaldo oo uu ku tilmaamay halyeeygiisa carruurnimada, isla markaana talooyin ka helo.

Si kastaba ha ahaatee, Mbappé ayaa hore u sheegay in goolashiisu noqon doonaan "wax aan micno lahayn" haddii Real Madrid aysan xilli ciyaareedkan ku guuleysan koobab waaweyn, waxaana haatan hal fursad oo kaliya uga harsan tahay in ay hanato horyaalka LaLiga, iyadoo afar dhibcood ka dambaysa Barcelona.

Tababaraha Real Madrid Carlo Ancelotti ayaa bishii hore sheegay in Mbappé "uu leeyahay fursad uu ku gaari karo magaca Ronaldo" isla markaana uu "u noqon karo halyeey kooxda."

Cristiano Ronaldo ayaa Real Madrid kula guuleystay afar Champions League iyo laba LaLiga, isagoo wadarta guud ee 450 gool u dhaliyay sagaal xilli ciyaareed ka hor intii uusan kooxda ka tegin 2018.

Ronaldo ayaa sanadkan horraantiisii hadal uu jeediyay ku sheegay in Real Madrid "ay si fiican u daryeesho" Mbappé, isagoo ku tilmaamay "ciyaaryahan heer sare ah," balse digniin u diray oo sheegay in xiddiga hore ee PSG "uusan ahayn weeraryahan caadi ah" isla markaana "uu u baahan yahay xoriyad uu qaabkiisa ciyaareed ku muujiyo."