Mikel Arteta ayaa daaha ka qaaday maskaxda ay Arsenal ku wajahdo lugta labaad ee Real Madrid.

Mikel Arteta ayaa sheegay in Arsenal oo “geesinimo leh oo dhiirran” aysan ka baqayn Real Madrid, islamarkaana uu doonayo kooxdiisu inay xaqiijiso booskeeda semi-finalka Champions League iyadoo ku garaacaysa kooxda weyn ee reer Spain garoonkooda Bernabeu. Arsenal waxay wajihi doontaa kooxda Carlo Ancelotti lugta labaad ee rubuc-dhamaadka iyadoo leh saddex gool oo dheeri ah, kaddib markii Declan Rice uu labo laad xor ah oo cajiib ah ku dhaliyay garoonka Emirates usbuucii hore. Si kastaba ha ahaatee, kooxda 15 jeer ku guuleysatay koobka Yurub waxay caan ku yihiin inay sameeyaan soo laabashooyin yaab leh – sida ay kaga soo kabsadeen Manchester City, Chelsea, Paris Saint-Germain iyo Bayern Munich sannadihii u dambeeyay. Ka hor hadalka Arteta, Jude Bellingham oo ka tirsan Real Madrid ayaa sheegay in ereyga ugu badan ee ka dhex socda qolka labiska ee kooxda Madrid kahor kulanka Arbacada uu yahay “soo laabasho”. Laakiin isagoo ka jawaabaya hadalka Bellingham, Arteta wuxuu yiri: **"Anaga maskax ahaan isla meel ayaan taaganahay. Maskaxdeennu waa guul, waa geesinimo, waa hoggaamin, waa adkeysi, iyo kalsooni aan ku qabno in aan ka fiicnaan karno iyaga oo aan ciyaarta guuleysan karno. Taasi waa fariinta aan ciyaartoyda u gudbiyay. Waxay sidaas sameeyeen London, hadda waa inaan sidaas oo kale sameynaa xaalad kale berri.”** Markii la weydiiyay in qaar ka mid ah warbaahinta Spain ay sheegayaan in Arsenal ay ka cabsanayso in Real Madrid ay soo laabato, Arteta wuxuu ku jawaabay: **"Anigu ereygaas 'cabsi' ma isticmaali lahaa. Waxaan leenahay ixtiraam iyo qadarin weyn oo ku aaddan waxa ay kooxdaasi sameysay sannado badan, taariikhdooda iyo qiyamka ay u taagan yihiin – waana wax la yaab leh. Waa dhiirigelin u ah tababare kasta, koox kasta. Laakiin ka dib, waa tartan. Waa ciyaarta aan la wajahno berri – koox aan si fiican u naqaano, waxaana go’aansanay inaan u dhigno ciyaar adag oo aan guul raadsano.”** Arsenal lama dhicin seddex gool kulan kaliya muddo 16 bilood ah tan iyo markii ay 4-3 uga adkaadeen Luton, mana aysan la kulmin guuldarro afar gool ah tan iyo markii Liverpool ay 4-0 ku garaacday bishii December 2021. Arteta ayaa intaas ku daray: **"Waa inaan mar kale sameynaa. Waa inaan ku caddaynaa xaaladdan hadda. Waana taas waxa quruxda badan ee ciyaaraha – waa caqabadda iyo sababta uu isboortigu u gaar yahay. Waxaan muujinnay inaan awoodno, taasna waxay nagu abuuraysaa kalsooni iyo degganaansho. Laakiin hadda, aan hadalkeena ku muujino garoonka, waana taas waxa kaliya ee muhiimka ah.”** Arteta wuxuu xaqiijiyay in khadka dhexe Thomas Partey, oo shaki laga qabay kaddib markii laga saaray kulankii 1-1 ay la galeen Brentford isagoo 20 daqiiqo harsan tahay, uu diyaar yahay. Daafaca Ben White isna waa uu taam yahay, halka Jorginho – oo jug kasoo gaartay feeraha kulankii Sabtidii – uusan safarkiisa la gelin kooxda. Arsenal waxay semi-finalka Champions League gaartay laba jeer oo kaliya – sannadkii 2006 iyo 2009 – mana aysan weligood ku guuleysan tartanka. Goolhayaha David Raya wuxuu yiri: **"Xaalada kooxda waa mid heer sare ah. Dareenku ma ahan cabsi, waa kalsooni – waa awood aan u leenahay inaan ku celino wixii aan sameynay kulankii hore oo aan halkaan u nimid si aan guul u raadino. Waxaan haysanaa mowjadda guusha. Waxaan halkaan u nimid inaan taariikhdeena sameyno, inaan guuleysano, waana taas waxa ugu muhiimsan.”**