Pep Guardiola wuxuu xaqiijiyay in laacibka khadka dhexe ee Manchester City uu si lama filaan ah u kordhiyay heshiiskiisa

Pep Guardiola wuxuu xaqiijiyay in la kiciyay qodob ogolaanaya kordhinta heshiiska Ilkay Gundogan oo ah ciyaaryahan khadka dhexe uga ciyaara Manchester City. Manchester City waxay dib ugu soo celisay Ilkay Gundogan xagaagii hore kadib markii uu hal xilli ciyaareed u ciyaaray Barcelona. Heshiiskiisa wuxuu ahaa hal sano oo ay ku jirtay ikhtiyaar kordhin ah oo 12 bilood ah, taasoo ku xirnayd tirada kulamada uu ciyaaro xilli ciyaareedkan. Inkastoo faahfaahinta rasmiga ah ee heshiiskiisa aan si cad loo shaacin, Gundogan wuxuu ku bilowday 31 kulan tartamada oo dhan wuxuuna noqday ciyaaryahanka todobaad ee ugu badan daqiiqadaha ciyaarta ee kooxda, taasoo caddeyn u ah inuu buuxiyay shuruudihii loogu kordhin lahaa heshiiska. Si kastaba ha ahaatee, Guardiola ma uusan xaqiijin in Gundogan sii joogi doono Etihad Stadium xilli ciyaareedka dambe, maadaama kooxda ay qorsheyneyso in ay dib u habeyn ballaaran ku sameyso ciyaartoydeeda – gaar ahaan iyadoo weli aan la xaqiijin inay ka qeybgalayaan Champions League xilli dambe. Guardiola ayaa yiri: “Wuxuu hadda leeyahay hal sano oo heshiis ah oo dheeraad ah, taasi waa xaqiiq. Laakiin waxa dhici doona xagaaga, ma hubo.” “Gundo-giisii aan ku ogaa Leicester, Bournemouth, iyo maanta Crystal Palace – waa isla Gundo-giisii aan xasuusto markii aan qaaday Treble iyo Quadruple. Waa ciyaaryahan muhiim ah.” “Waxqabadkiisa, degdegga uu ku ciyaaro, iyo fahamka difaaca waa mid muhiim ah. Laakiin koox ahaan umaan fududeyn; sababtoo ah haddii kooxda si fiican u ciyaarto, ciyaartoyduna waxay gaaraan heer sare. Haddii taa la’aanteed, ma suurtogal tahay xilligaan kubadda casriga ah.” Gundogan wuxuu ahaa mid ka mid ah tiirarka Guardiola intii uu joogay Man City markii ugu horreysay – isagoo 304 kulan u saftay intii u dhaxeysay 2016 iyo 2023, wuxuuna qeyb ka ahaa 5 horyaal Premier League iyo guushii Champions League ee 2022/23. Ka dib markii heshiiskiisu dhammaaday, wuxuu u wareegay Barcelona, balse waxa uu dib ugu soo laabtay Man City kaddib 12 bilood, markaas oo Guardiola si gaar ah u codsaday in la keeno. Inkastoo uu weli qeyb muhiim ah ka yahay shaxda Guardiola, waxaa soo baxaya su’aalo la xiriira inuu weli la jaanqaadi karo xawaaraha kubadda casriga ah, maadaama kooxda qorsheyneyso in ay dhisto khad dhexe oo cusub – iyadoo Kevin De Bruyne laga yaabo inuu noqdo ciyaaryahanka ugu magaca weyn ee baxaya. Haddii kooxo kale ay xiiseynayaan Gundogan – wararku waxay sheegayaan in laga yaabo inuu u wareego Turkiga – hadda waa inay la xaajoodaan Man City halkii ay toos ula xiriiri lahaayeen ciyaaryahanka.