Rajooyinka horyaalka ee Arsenal ayaa mar kale dhaawacmay iyadoo Brentford ay kasoo laabatay si ay barbaro ula gasho.

Rajooyinka dhiman ee Arsenal ee hanashada horyaalka Premier League ayaa mar kale dharbaaxo culus la kulmay kaddib markii ay barbaro 1-1 ah la galeen Brentford garoonka Emirates. Afar maalmood uun kaddib guushii cajiibka ahayd ee 3-0 ay ka gaareen Real Madrid tartanka Champions League, ciyaartoyda Mikel Arteta ayaa si xun hoos ugu dhacay kaddib barbarahan, taasoo ka dhigaysa inay hadda 10 dhibcood ka hooseeyaan Liverpool iyagoo ciyaar intaas ka badan ciyaaray. Thomas Partey ayaa daah furay goolasha Arsenal daqiiqaddii 61-aad, balse Brentford ayaa ku jawaabtay 13 daqiiqo kaddib iyadoo uu goolka barbaraha dhaliyay Yoane Wissa. Barbarahaas wuxuu la micno yahay in Liverpool ay hogaanka u dheerayn karto 13 dhibcood haddii ay West Ham ka garaacdo Anfield maalinta Axadda. Liverpool waxaa xitaa suuragal ah in horyaalka loo caleemo saaro toddobaadka dambe haddii Arsenal laga badiyo kulankooda xiga ee horyaalka ee ay la ciyaarayaan Ipswich, isla markaana kooxda Arne Slot ay ka adkaato West Ham iyo Leicester kulanka Easter Sunday ka dhici doona King Power Stadium. Arteta oo sameeyay shan beddel ciyaarta ayaa go’aansaday inuu kusoo bilaabo Declan Rice oo ahaa geesigii kubbadaha taayarta laga dhaliyay kulankii Madrid, waxaana la arkayay isagoo si xooggan u dhiirrigelinaya ciyaartoydiisa isagoo ku qeylinaya “Aan soconno” kaddib 20-daqiiqo oo bilow gaabis ah oo ciyaartu la mid ahayd kulan saaxiibtinimo. Brentford ayaa abuurtay fursaddii ugu horreysay ee dhab ah markii Bryan Mbeumo uu kubbad u dhiibay Kristoffer Ajer balse David Raya ayaa ka hortagay. Kieran Tierney ayaa shabaqa gaaray markii uu madax ku dhaliyay baas uu ka helay Ethan Nwaneri daqiiqaddii 26-aad, balse waxa uu ku jiray offside waxaana VAR lagu laalay goolka. Christian Norgaard ayaa nasiib u yeeshay inuu ka badbaado kaarka cas kaddib markii la islahaa lafdhabarta ayaa laga siibay Gabriel Martinelli, taasoo lagu xukumay oo kaliya in loo diro jaale. Arteta ayaa aad uga cadhooday go'aankaas. Goolhayaha Brentford, Mark Flekken, ayaa kubbad xoogan oo uu laaday Oleksandr Zinchenko u weeciyay gees corner ah, sidoo kalena wuxuu ka hortagay laad uu Rice qaaday shan daqiiqo kahor nasashada. Leandro Trossard ayaa isku dayay inuu gool ka dhaliyo meel fog, balse Flekken ayaa gacantiisa u adeegsatay si uu uga hortago, iyadoo qaybtii hore lagu kala nastay barbaro goolal la’aan ah. Markii la gaaray saac, Arsenal waxay si weyn ugu baahnaayeen isbeddel ciyaareed. Bukayo Saka, oo si cajiib ah uga soo muuqday kulankii Madrid, kabtanka Martin Odegaard iyo Myles Lewis-Skelly ayaa loo sheegay inay is diyaariyaan. Laakiin kahor intaysan kusoo galin garoonka, Arsenal ayaa heshay goolkii ay sugayeen. Brentford ayaa soo tuurtay gees corner ah, David Raya ayaa si dhaqso leh kubadda uga soo qaaday xariiqda xerada isagoo u dhiibay Rice. Rice ayaa hal taabasho ku baasay Mikkel Damsgaard si qurux badan uga saaray ciyaarta, wuxuuna bilaabay weerar degdeg ah isagoo wajahaya Wissa iyo Keane Lewis-Potter oo aan go’aan qaadan karin. Martinelli ayaa ku sugnaa hal dhinac halka Partey uu ka jiray dhinaca kale, waxaana Rice uu si sax ah ugu dhiibay Partey kaasoo kubadda si xoog leh ugu hubsaday shabaqa. Dhammaan weerarkaasi wuxuu qaatay 14 ilbiriqsi kaliya laga soo bilaabo marka Raya kubadda qabtay ilaa goolka la dhaliyay. Arsenal waxay filayeen in goolkaasi uu ku filnaan doono, balse Brentford ayaan sidaas ogoleyn. Michael Kayode oo beddel kusoo galay ayaa helay meel furan dhanka midig ee Arsenal, wuxuuna kubbad u qaaday Nathan Collins kaasoo madax kula tagay Yoane Wissa, isagoo kubadda si fiican ugu leexiyay goolka. Saka ayaa helay fursad uu mar kale hogaanka ugu soo celin lahaa Arsenal markii uu Flekken ku qabtay qalad, balse wuu sugi waayay inuu si degdeg ah u laado, taasoo keentay in Flekken uu iska saxo qaladkiisii. Arsenal waxay raadinayeen gool guul ah, Saka ayaana ahaa midka ugu dhow inuu dhaliyo laakiin laadkiisii ayaa dhinaca ka maray birta fog ee Flekken, waqtigii dheeriga ahaa. Laakiin xaqiiq ahaan, Arsenal marna ma aysan u muuqan kuwo dhaliya gool labaad, hadda waxay u jeedsan doonaan kulanka lugta labaad ee quarter-finalka Champions League ee ay la leeyihiin kooxda Carlo Ancelotti ee Real Madrid Arbacada.