Rasmus Hojlund oo United u badbaadiyay barbardhac xilli dambe kadib casaan la siiyay Evanilson

Rasmus Hojlund ayaa barbaro u suura geliyay Manchester United daqiiqadihii ugu dambeeyay ee ciyaarta, kadib markii ay ka faa’iidaysteen casaan uu qaatay weeraryahanka Bournemouth ee Evanilson, kulan 1-1 ku soo dhammaaday garoonka Vitality Stadium.

Kooxda Ruben Amorim oo wajahaysay guuldaradii 16-aad ee xilli ciyaareedkooda ugu liitay Premier League, ayaa hogaanka qabatay daqiiqadii 23aad markii Antoine Semenyo uu gool u dhaliyay.

Laakiin Evanilson ayaa casaan toos ah qaatay daqiiqadii 70aad kadib markii uu qalad daran ku galay Noussair Mazraoui, taasoo is bedel ku keentay ciyaarta, kahor inta uusan Hojlund ka dhigin 1-1 isagoo shabaqa ka dhameeyay kubbad ka timid qalad difaac oo dhacay daqiiqadii lixaad ee sagaalkii daqiiqo ee lagu daray waqtiga dheeriga ah.

Natiijadan ayaa dhaawacday rajadii Bournemouth ee u soo bixitaanka Yurub, halka Manchester United ay heli karto dhiirigelin yar kahor lugta hore ee semi-finalka Europa League oo ay la ciyaarayaan Athletic Bilbao Khamiista.

Luke Shaw ayaa sameeyay kulankiisii ugu horreeyay tan iyo finalkii Euro 2024, isagoo ka mid ahaa shan isbeddel oo United ay sameysay marka loo eego kooxdii guuldarrada kala kulantay Wolves, halka Bournemouth aysan waxba ka beddelin safkoodii barbaraha gool la'aanta ah ee ay la galeen Crystal Palace.

Ciyaarta ayaa ahayd mid iska caadi ah 20-kii daqiiqo ee ugu horreysay, ka hor inta aysan si lama filaan ah u kululaan.

Xiddiga khadka dhexe ee Bournemouth Tyler Adams ayaa ka badbaaday kaadh casaan kadib markii uu qalad xoog leh ku galay Alejandro Garnacho, VAR-kana uu ku tijaabiyay, balse digniin kaliya ayuu ku dhaafay, kahor inta aysan United si niyad jab leh uga dhalan goolka Bournemouth.

Kubbado gaagaaban oo ay ka yimaadeen Andre Onana iyo Luke Shaw ayaa cadaadis saaray Patrick Dorgu oo garabka bidix ka ciyaarayay, waxaana kubbada ka dhacay Adam Smith oo markaas kadib u baasay Evanilson, kaasoo isna u sii dhiibay Semenyo oo si qurux badan shabaqa u dhex dhigay, iyadoo kubbadu si yar ugu dhacday Casemiro.

Amorim iyo kooxdiisa ayaa fursad weyn seegay 7 daqiiqo kahor nasashada, kadib markii daafaca Bournemouth Illia Zabarnyi uu ku guuldareystay inuu joojiyo baas toos ah oo Bruno Fernandes bixiyay, balse Garnacho ayaa kubbadii uu dhaliyay si cajiib ah uga beeniyay goolhayaha Kepa Arrizabalaga.

Inkastoo United uu ku socdo xilli ciyaareedkooda ugu liita Premier League, Bournemouth ayaa dhanka kale ku raaxaysanaya midkoodii ugu fiicnaa.

Kooxdaas xeebta Koonfureed ee Ingiriiska, ayaa todobaadkan dib u iibsatay garoonkooda Vitality oo leh 11,286 kursi, iyagoo qorsheynaya inay ballaariyaan ilaa 20,000 kursi muddo laba sano iyo badh gudahood ah.

Qeybta labaad ee ciyaarta, Semenyo ayaa u dhowaaday inuu labo jibaarto hogaanka, kadib markii uu si qalloocan u toogtay, halka Dango Ouattara uu birta garaacay daqiiqadii 60aad markii uu laad xor ah ku tuuray kubbad halis ah.

Dhinaca kale, Kepa ayaa badbaadiyay kubbado kale oo ay soo tuureen Dorgu iyo Harry Maguire.

Rajadii United ee ah in ay wax ka helaan ciyaarta ayaa korortay markii Evanilson casaan la siiyay kadib dib u eegis VAR lagu sameeyay qalad uu ku galay Mazraoui.

Kabtan Adam Smith iyo macallin Andoni Iraola ayaa kaarka jaalaha ah lagu siiyay cabasho ay u jeediyeen garsooraha Peter Bankes, iyadoo taageerayaasha Bournemouth ay sidoo kale muujinayeen caro.

United ayaa si buuxda u qabsatay kubbadda daqiiqadihii ugu dambeeyay ee ciyaarta.

Mason Mount ayaa fursad weyn seegay daqiiqadii 89aad kadib markii kubbadiisa ay si dhuuban uga dhacday Marcos Senesi, halka beddelka kale ee Chido Obi uu imtixaanay Kepa, sidoo kalena Fernandes uu si dhuuban u taabtay shabaqa dhinaceeda.

Iyadoo ay ciyaartu aheyd kulankoodii 300-aad ee taariikhda Premier League, Bournemouth waxay u muuqdeen kuwo haysta guushii ugu horreysay ee labada kulan ee horyaalka ay kaga badiyaan United.

Laakiin waqtigii dhamaadka, Luke Shaw ayaa dhigay kubbad hoose oo ka timid garabka bidix, waxaana isku day uu Manuel Ugarte kubbada ku leexiyay u suurtagashay in Rasmus Hojlund uu si deg deg ah shabaqa ugu labeeyo, isagoo u badbaadiyay United hal dhibic.