Real Madrid ayaa diiradda saartay xiddig qiimihiisu yahay $92M oo lala xiriirinayay Liverpool iyo Arsenal.

Waxaa la sheegay in Real Madrid ay xiiseyneyso daafaca Nottingham Forest ee Murillo iyadoo ay suuqa kala iibsiga ka raadinayso daafac dhexe oo cusub.

Real Madrid ayaa sanadkan la daalaa dhaceysay dhibaatooyin dhaawacyo ah oo ka dhacay dhanka daafaca, iyadoo Eder Militao, David Alaba iyo Dani Carvajal ay dhammaantood la kulmeen dhaawacyo halis ah oo jilbaha ah xilli ciyaareedkan. Kooxda reer Spain ayaa la filayaa inay la soo wareegto daafaca Liverpool ee Trent Alexander-Arnold, 26-jir, si bilaash ah xagaaga, iyadoo lagu beddelayo Carvajal mustaqbalka fog, halka Murillo uu muuqanayo inuu yahay bartilmaameed kale oo daafac dhexe ah.

Real Madrid iyo Chelsea ayaa labadaba lagu magacaabay kooxaha xiiseynaya Murillo, kaasoo Nottingham Forest ay ku qiimeyneyso €80 milyan ($92 milyan).

Liverpool iyo Arsenal ayaa sidoo kale la sheegay inay xiiseynayaan xiddiga reer Brazil, iyadoo labada kooxood ay horay ugu fashilmeen wadahadallo ay ku doonayeen inay ku helaan Murillo inta lagu jiray suuqa Janaayo.

Waxaa la fahamsan yahay in Nottingham Forest ay si weyn u dooneyso inay sii haysato Murillo, iyadoo warbixintu sheegeyso in kooxda ay dooneyso inay heshiis cusub oo soconaya ilaa 2030 ka saxiixdo. Fursadaha Forest ee ah inay haystaan Murillo ugu yaraan hal xilli ciyaareed oo kale ayaa si weyn u kordhi kara haddii kooxda Nuno Espirito Santo ay u soo baxdo Champions League xilli ciyaareedka dambe.

Liverpool ayaa laga yaabaa inay suuqa u gasho daafac dhexe xagaagan, inkastoo Virgil van Dijk uu laba sano oo dheeri ah heshiis kula sii joogi doono kooxda. Heshiiskii hore ee Van Dijk ayaa dhacayay 30-ka Juun sanadkan, balse midka cusub ayaa ku xiraya kooxda ilaa 2027.

Si kastaba ha ahaatee, Van Dijk wuxuu laba toddobaad uun ka fogaan doonaa da'da 36 jir marka heshiiska cusub uu dhacayo, halka ay dhibaatooyin ka imaan karaan dhanka daafacyada kale ee kooxda.

Ibrahima Konate ayaa heshiiskiisu dhacayaa dhammaadka xilli ciyaareedka soo socda, halka Joe Gomez uu xilli ciyaareedka dambe u galayo isagoo dhowr bilood dhaawac uga maqnaa kadib qalliin lagu sameeyay muruqa bowdada. Dhanka kale, Jarell Quansah ayaa wajahey xilli ciyaareed hoos u dhac ah kadib markii uu xilli ciyaareedkii 2023-24 noqday lamaanaha koowaad ee Van Dijk ee uu doortay Jurgen Klopp.

Murillo oo kaliya ma aha bartilmaameedka, daafaca dhexe ee da'da yar ee reer Spain Dean Huijsen ayaa isna lala xiriirinayaa Anfield kadib qaab ciyaareed cajiib ah uu u sameeyay Bournemouth xilli ciyaareedkan.

Huijsen wuxuu dhawaan ka yimid Juventus kuna biiray Bournemouth xagaagii lasoo dhaafay, balse wuxuu si heer sare ah uga hoos ciyaaray tababaraha Andoni Iraiola, ilaa uu ka ciyaaray labada kulan ee Nations League ee ay Spain la ciyaartay Netherlands intii lagu jiray fasaxii caalamiga ahaa ee bishii Maarso.