Real Madrid oo bartilmaameedsanaysa xiddig labaad oo Liverpool ah iyadoo Perez uu doonayo inuu xiddig kale u adeegsado sidii ‘kala beddelasho.

Real Madrid oo bartilmaameedsanaysa xiddiga khadka dhexe ee Liverpool Alexis Mac Allister xagaaga soo socda, sida ay warbixinadu sheegayaan. Kooxda Reds waxay xilli ciyaareed cajiib ah ku qaadanaysaa horyaalka Premier League, iyadoo ciyaartoyda Arne Slot ay u socdaan inay qaadaan horyaalkoodii 20-aad ee Ingiriiska. Guushii 2-1 ee ay ka gaareen West Ham Axaddii ayaa sii xoojisay booska ay ku sugan yihiin, iyadoo Liverpool hadda 13 dhibcood ka horreyso Arsenal oo ku jirta kaalinta labaad, iyadoo lix kulan ay ka dhiman yihiin horyaalka. Waxaa jiray warar sheegaya in Mohamed Salah iyo Virgil van Dijk ay xagaaga ka tagi karaan kooxda, balse Salah ayaa hadda saxiixay heshiis cusub, waxaana sidoo kale la filayaa in kabtanka Liverpool Van Dijk uu isla sidaas yeelo maalmaha soo socda. Trent Alexander-Arnold ayaa wali qorshuhu yahay inuu xagaaga si xor ah ugu biiro Real Madrid, iyadoo ciyaartoy kale oo kooxda Slot ka tirsan ay si weyn u daneynayaan kooxaha kale ka hor furitaanka suuqa kala iibsiga. Mac Allister – oo door weyn ka ciyaaray guulaha Liverpool – ayaa sidoo kale doonaysa kooxda weyn ee La Liga, iyadoo warbaahinta reer Spain ee Fichajes ay sheegtay in xiddiga xulka Argentina uu "ka mid noqday mudnaanta ugu weyn ee Real Madrid." Madaxweynaha Real Madrid Florentino Perez iyo xubno ka tirsan guddiga sare ee kooxda ayaa si gaar ah u xiiseynaya qaab ciyaareedka Mac Allister, waxaana lasoo jeediyay in ciyaartoy kale lagu daro heshiiska si ay Liverpool u qanciyaan. Warbixinta ayaa sii raacisay: "Magaca ka mid noqday ciyaartoyda lagu baddalan karo Mac Allister waa Arda Güler. Xiddiga da’da yar ee reer Turkey, oo labo xagaa kahor ay Real Madrid la saxiixatay iyadoo laga filayey wax weyn, ayaan helin fursad uu ku muujiyo tayadiisa ciyaareed ee Carlo Ancelotti. "Dhaawacyo joogto ah iyo tartan adag oo ka jira khadka dhexe ayaa xaddiday waqtigiisa ciyaarta, waxaana suuragal ah in u wareegistiisu ay fursad u noqoto inuu helo waqti ciyaareed sare. Liverpool, oo had iyo jeer indhaha ku haysa ciyaartoyda da’da yar, ayaa si wanaagsan u soo dhoweyn lahayd saxiixiisa. "Inkasta oo Güler sumcad weyn leeyahay, haddana u muuqata in ku daristiisu aysan kaliya ku filneyn in lagu helo Mac Allister. Liverpool waxay Mac Allister u aragtaa maalgashi waqti dheer ah, mana jirto wax degdeg ah oo ku saabsan inay iska iibiyaan. "Sidaas darteed, Real Madrid ayaa la sheegayaa inay diyaar u tahay inay lacag weyn ku darto heshiiska, taasoo laga yaabo inay labada dhinac ka dhowaajiso. Wadahaladu wali waa heer hore, laakiin waxaa la filayaa inay si dhakhso leh u horumaraan toddobaadyada soo socda." Tababaraha Liverpool ee Arne Slot ayaa qirtay inuu dareemay “nafis weyn” markii goolkii guusha uu Van Dijk ka dhaliyay West Ham uu shabaqa galay kadib cadaadiskii uu West Ham saaray ciyaarta dhamaadkeeda. Slot ayaa shir jaraa’id kadib ciyaarta yiri: “Waa nafis weyn. Ali (Alisson Becker) ayaa xaqiijiyay inaysan goolal hore u dhalin. Fursado badan ayay heleen qeybtii labaad si ay u dhaliyaan goolka barbaraha, nasiib wanaag hal mid ayay dhaliyeen, annaguna mid kale ayaanu dhalinay. "Si daacad ah hadii aan u hadlo, waxaan filayay in labo ilaa saddex daqiiqo oo kaliya lagu daro waqtiga, laakiin si lama filaan ah ayaa toddobo daqiiqo lagu daray iyadoo aysan labada kooxba waqti lumin. Taas waan la yaabay. "Laakiin si wanaagsan ayay noogu soo baxday maxaa yeelay goolka guusha ayaan dhalinay ka hor inta aan lagu darin waqtiga dheeraadka ah, taasna waa nafis weyn maxaa yeelay markii West Ham ay goolka keeneen iyo sida ciyaarta u socotay qeybtii labaad, waxaad filan kartay in iyaga goolka labaad dhalinayaan. "Laakiin taageerayaasheena iyo ciyaartoydeena si ka duwan ayay u fakareen. Laga bilaabo markay West Ham goolka keeneen, annaga dib ayaan u bilownay ciyaarta, waxaan bilaawnay inaan cadaadin saarno, taageerayaashu aad bay u qeylinayeen waqtigaas. "Fursaddii Lucho Diaz, iyo cadaadisyo badan oo sababay goolka koornaha, ugu dambeyntiina waxaannu badbaadsannay kubbad dhimatay oo aad muhiim u ahayd. Maanta markale waxaa la arkay sida muhiimka ah ee ay yihiin goolasha laga dhaliyo kubbadaha dhiman ee casriga ah ee kubadda cagta."