Saddexleeydii Serhou Guirassy waxba uma aysan tarin Borussia Dortmund iyadoo Barcelona ay iska caabisay cadaadiska si ay ugu gudubto semi-finalka.

Kooxda shan jeer ku guuleysatay Champions League, Barcelona, ayaa markii ugu horreysay lix xilli ciyaareed gudahood gaartay semi-finalka tartanka, inkasta oo ay 3-1 kaga adkaatay Borussia Dortmund lugtii labaad, iyagoo guul wadareed ah ku gaaray 5-3. Serhou Guirassy ayaa saddexleey dhaliyay Borussia Dortmund, taasoo ahayd guuldarradii ugu horreysay ee Barcelona la kulanto tartamada oo dhan sannadkan, balse ma aysan hor istaagin kooxda reer Catalonia inay u gudbaan afar dhamaadka. Barcelona waxay la ciyaari doontaa midkood Inter Milan ama Bayern Munich, kuwaasoo is wajihi doona Arbacada, si loo helo lammaanaha finalka. Dortmund ayaa si xooggan ku bilaabatay ciyaarta iyadoo raadinaysay inay ka soo kabsato guuldarradii 4-0 ee lugtii hore. Kooxda reer Jarmal, oo Sabtidii 2-2 la gashay Bayern Munich horyaalka Bundesliga, waxay heleen laba fursadood oo dahabi ah daqiiqadihii hore ka hor inta uusan Guirassy laad rigoorayaal ah oo jeex ah dhallin daqiiqaddii 11-aad, taasoo siisay hogaanka ay mudnaayeen. Barcelona, oo aan laga badin sanadka 2025 kahor ciyaartan, waxay si tartiib tartiib ah u bilaabeen inay ciyaarta dib ula qabsadaan, waxayna fursad weyn u lahaayeen inay barbaro keenaan haddii uusan Jules Kounde si liidata u dhameystirin fursad dahabi ah daqiiqaddii 40-aad. Qeybtii labaad, Dortmund ayaa markale ku bilaabatay si xooggan, waxaana Guirassy madax ku dhaliyay gool labaad kadib markii Ramy Bensebaini uu kubbad ka madaxay koorno afar daqiiqo kadib bilowga qeybta labaad, taasoo ifisay rajadii soo laabasho taariikhi ah. Dortmund waxay isku dayayeen inay la mid noqdaan rikoodhkii Barcelona ee ahaa in la rogo afar gool oo lugtii hore looga hormaray heerka bug-baxa, balse rajooyinkooda waxaa baabi’iyay gool uu iska dhaliyay Bensebaini daqiiqaddii 54-aad, taasoo dejisay cadaadiskii saarnaa kooxda reer Spain. Robert Lewandowski ayaa cadaadis saaray Bensebaini isagoo raacayay kubbad laga soo celiyay Fermin Lopez, taasoo keentay in Bensebaini uu kubbadda si khaldan shabaqiisa ugu leexiyo. Fermin Lopez ayaa sidoo kale fursad fiican helay daqiiqaddii 64-aad, balse laadkiisa wuxuu ka baxay bartilmaameedka. Guirassy, oo noqday ciyaaryahankii ugu horreeyay ee Borussia Dortmund u dhaliya 13 gool hal xilli ciyaareed Champions League, ayaa saddexleeydiisa dhameystiray daqiiqaddii 76-aad isagoo ka faa’iideystay qalad difaac. Si kastaba ha ahaatee, Dortmund waxay u baahnayd laba gool oo kale si ay ciyaarta waqti dheeri ah ugu gudubto, balse ugu dambeyn tamartii ay la yimaadeen ayaa yaraatay, waxaana ay ku hareen tartanka iyadoo Barcelona ay u gudubtay semi-finalka.