Dabaaldegii Trent Alexander-Arnold ee ciyaartii uu goolka guusha ka dhaliyay kulankii ay Liverpool 3 dhibcood u jirsatay horyaalka Premier League 2024-25, isagoo xijaabkiisa iska siibay, ayaa si weyn u hadal hayn noqday.
Inkastoo la isla ogaa in xiddigan reer England uusan cusbooneysiin doonin heshiiskiisa Liverpool, islamarkaana uu xor ugu wareegi doono Real Madrid marka qandaraaskiisu dhamaado xagaagan, haddana qaar ka mid ah taageerayaasha ayaa is weydiiyay in xaaladdu is bedeshay kadib dabaaldegii dareenka lahaa ee uu sameeyay.
Hase yeeshee, laacibkii hore ee Liverpool, Jan Mølby, ayaa sheegay in dhammaan dadka uu xiriirka la leeyahay oo ku dhow Real Madrid ay aaminsan yihiin in heshiiska Alexander-Arnold uu dhameystiran yahay.
“Ma jiro hal qof oo Real Madrid la xiriira oo aan aaminsaneyn in uu Trent ku biiray kooxda,” ayuu yiri Mølby podcast uu la yeeshay Trevor Downey. “Dhammaantood waxay u arkaan in heshiiska la dhammeeyay waqti hore.”
Inkastoo Mølby uu qirtay in Alexander-Arnold “uusan u ekaan mid ka tagaya Liverpool markii uu dabaaldegayay, balse uu u ekaa ciyaaryahan jecel kooxdiisa oo guul muhiim ah u keenay,” haddana wuxuu rumeysan yahay in tani ay ahayd kaliya farxad ka dhalatay guusha iyo u dhowaanida horyaalka.
Dhanka kale, ciyaaryahankii hore ee Premier League, Ben Foster, ayaa podcast-kiisa uga hadlay suurtagalnimada in dabaaldeggu yahay calaamad muujinaysa in Arnold laga yaabo inuu go'aankiisa beddelo.
Waxaa su'aal taagan tahay: Ma noqon doontaa dabaaldeggii Alexander-Arnold mid calaamad u noqda in uu sii joogo Anfield, mise Real Madrid ayay u tahay heshiis la dhammeeyay?
Wixii warar kale oo xanta suuqa iyo ciyaartoyda, la soco KOOOXDAMANTA.COM